Հարգելի'  կայքի այցելուներ, տեխնիկական պատճառներով հարցերին պատասխանելը ժամանակավորապես հնարավոր չէր, և որոշ հարցեր, որոնց պատասխանելն այլևս ակտուալ չէ, հեռացվել են կայքից: Խնդրում ենք, եթե Ձեր հարցերը դեռևս ակտուալ են, նորից գրել:  Հայցում են Ձեր ներողամտությունը պատճառված անհարմարության համար:

Հարգելի Elen, բարև Ձեզ: Կախված է էրոզիայի աստիճանից, այն բանից կան ատիպիկ բջիջներ թե ոչ, իսկ դա կարելի է պարզել ցիտոլոգիական քննությամբ: Եթե կան արդեն ատիպիկ բջիջներ, հարկավոր է անպայման ստանալ բուժում, որը այդ դեպքում ենթադրում է վիրաբուժական միջամտություն` արգանդի վզիկի էլէկտրոկոնիզացիա: Չբուժելու դեպքում մեծ է ռիսկը հետագայում արգանդի վզիկի քաղցկեղի առաջացման: Եթե էրոզիան սկզբնական փուլերում է բուժումը կոնսերվատիվ է` դեղորայքային, որից հետո հարկավոր է լինել անընդհատ դինամիկ հսկողության տակ:

Հարգելի SUSANNA, բարև Ձեզ: Նման չափի միոման, հատկապես եթե կա ցավային համախտանիշ և արյունահոսություն, միանշանակ վիրահատության կարիք ունի, բացի այդ Դուք արդեն դաշտանադադարի մեջ եք, և պահել արգանդն ուղղակի իմաստ չունի: Բարդություններից խուսափելու համար խորհուրդ ենք տալիս անպայման դիմել գինեկոլոգ-վիրաբույժի խորհրդատվության:

Հարգելի Alina, եթե կա արյունահոսություն, հատկապես, եթե այն երկարատև է, անկախ միոմայի տեղակայումից և նրա չափերից, վիրահատություն անհրաժեշտ է: Վիրահատական միջամտության տեսակը կախված է միոմայի տեղակայումից, եթե այն ունի սուբսերոզ տեղակայում, հատկապես, եթե ոտիկի վրա է, հնարավոր է կատարել կոնսերվատիվ միոմէկտոմիա, այսինքն հեռացնել միայն միոմատոզ հանգույցը պահպանելով արգանդը: Եթե միոման տեղակայված է ինտերստիցիալ, այսինքն արգանդի պատի մեջ կամ սուբմուկոզ, միակ տարբերակը արգանդի հեռացումն է, հավելումներով կամ առանց հավելումների, դա արդեն կախված է հավելումների վիճակից: Իհարկե երիտասարդ կանանց մոտ ձվարաննեի հեռացումը ցանկալի չէ, քանի որ առաջացնում է հորմոնալ շեղումներ, և կարիք է լինում հետագա փոխարինող հորմոնալ բուժման: Եթե հնարավոր է պահպանել ձվարանները, չեն հեռացվում: Հետվիրահատական շրջանը նույնպես կախված է վիրահատության ծավալից, եթե վիրահատությունն ընթանում է հարթ և հետվիրահատական բարդություններ չկան, հիվանդները դուրս են գրվում ամենաուշը 7 օր հետո: 

Հարգելի Mila, բարև Ձեզ: Նշված միջոցները ավանդական միջոցներ են, որոնք հնարավոր է, որ կանգնեցնեն միոմայի աճը, սակայն վստահ լինել չի կարելի, հարկավոր է անընդհատ լինել բժշկի հսկողության տակ: Միոմայի չափերի մեծացման կամ արյունահոսության դեպքում հարկավոր է վիրահատական միջամտություն: Նման չափերի միոմայի դեպքում ավանդական միջոցներով լրիվ ներծծում քիչ հավանական է, նույնիսկ դեղորայքային բուժման դեպքում լրիվ ներծծում դժվար լինի: Սակայն, եթե այժմ գանգատներ չկան, հարկավոր է ուղղակի դինամիկ հսկողություն: Պոստկլիմակտերիկ շրջանում նկատվում է միոմայի աճի կանգ, որոշ դեպքերում նաև չափերի փոքրացում:

Հարգելի Nara, բարև Ձեզ: Ձեր հարցից անհասկանալի է, որ հատվածում են ցավերը և ինչու եք ուզում կալցիում օգտագործել, խնդրում եմ ավելի մանրամասն գրեք, կփորձենք Ձեզ օգնել:

Հարգելի Armine, բարև Ձեզ: Արգանդի միոման հորմոն կախյալ բարորակ ուռուցք է: Նրա չափերի մեծանալը կամ փոքրանալը կախված է հորմոնալ ֆոնից, հիմնականում պոստկլիմակտերիկ շրջանում նկատվում է միոմայի չափերի փոքրացում, փոքր չափերի դեպքում հնարավոր է լրիվ ներծծում: Դուք նշում եք, որ կա միոմայի չափերի փոքրացում, դա շատ լավ է, հավանականությունը իհարկե մեծ չէ, որ այն լրիվ կանհետանա, բայց ամեն ինչ հնարավոր է: Հարկավոր է անընդհատ լինել բժշկի հսկողության տակ: 

Հարգելի Nona,նման չափերի միոմաները,այն էլ երկուսը կարող են առաջացնել մի շարք բարդություններ`արյունահոսություն,սնուցման խանգարում և այլն: Քիչ հավանական է,որ դրանք ինքնուրույն փոքրանան կամ որևէ կոնսերվատիվ միջոց օգնի: Այս դեպքում վիրահատական բուժումը ցանկալի է: